नेपालगञ्ज, साउन २ । नेपालगञ्ज भन्सारबाट लक्ष्यभन्दा झण्डै २ अर्ब बढी राजश्व संकलन भएको छ । सरकारले आर्थिक बर्ष २०७४/७५ मा ८ अर्ब ३७ करोड ६४ लाख ५२ हजार रुपैयाँ राजश्व उठाउने लक्ष्य राखेकोमा भन्सार कार्यालयले १० अर्ब २७ करोड २२ लाख ३६ हजार रुपैयाँ राजश्व संकलन गरेको हो ।

Advertisement

लक्ष्यभन्दा २३ प्रतिशत बढी राजश्व संकलन भएको निमित्त कार्यालय प्रमुख माधव प्रसाद आचार्यले बताउनुभयो । यो गत आर्थिक बर्षको भन्दा ३ अर्ब ६ करोड ४९ लाख बढी भएको आचार्यले जानकारी दिनुभयो । आचार्यका अनुसार सबैभन्दा बढी राजश्व हवाई इन्धनबाट संकलन भएको छ ।

हवाई इन्धनबाट २ अर्ब ६६ करोड ८५ लाख ९८ हजार राजश्व संलकन भएको छ । त्यस्तै सिमेन्ट आयातबाट १ अर्ब ५३ करोड ४७ लाख ४ हजार रुपैयाँ, पेट्रोलियम पदार्थबाट ९९ करोड २६ लाख १८ हजार रुपैयाँ राजश्व उठेको आचार्यले बताउनुभयो ।