नेपालगन्ज, २ माघ । सुविन भट्टराईको चर्चित उपन्यास ‘समर लभ’मा आधारित फिल्म समर लभ माघ २५ गतेदेखि प्रदर्शनमा आउँदैछ । मुस्कान ढकालद्वारा निर्देशित फिल्म प्रेम दिवसको अवसरमा माघ २५ गतेदेखि प्रदर्शनमा आउन लागेको हो ।

Advertisement

आशिष पिया र रेवती क्षेत्रीको मुख्य भूमिका रहेको समर लभका बारेमा जानकारी दिन नेपालगञ्जमा आज आयोजना गरिएको पत्रकार सम्मेलनमा नायक पियाले धेरैले पढिसकेको चर्चित उपन्यासमा आधारित भएर फिल्ममा काम गर्नुपर्दा आफूहरुलाई चुनौति भएपनि निकै महेनत गरेर सफलतापूर्वक चरित्र निभाएकाले दर्शकले रुचाउने बताउनुभयो । नायिका क्षेत्रीले उपन्यास पढ्दा जुन आनन्द पाठकले पाएका छन् त्यो भन्दा पनि रमाइलो अनुभूति हुने गरी आफूहरुले काम गरेको बताउनुभयो । फिल्ममा सुरजसिंह ठकुरी, नम्रता सापकोटा लगायतका कलाकारको पनि भूमिका रहेको छ ।

नाइटिङ्गगेल इन्टरटेनमेन्टको प्रस्तुति रहेको फिल्मका गीतमा पुष्पन प्रधानको शब्द, संगीत र स्वर रहेको छ । पत्रकार सम्मेलनमा निर्माता विनोद अधिकारी, इन्दु भण्डारी लगायतको उपस्थिति थियो ।