बागलुङ, २३ माघ ।गत बुधबार राति जिल्लाको कुश्मीसेरा–५ का ४५ वर्षीया कृष्णबहादुर थापाको हत्यामा संलग्न रहेको आरोपमा प्रहरीले दुई जना युवालाई पक्राउ गरेको छ। बुधबार राति कुश्मीसेरा–८ तिनहरेमा मृतक थापाको शव फेला परेपछि प्रहरीले अनुसन्धान थालेको थियो । पक्राउ पर्नेमा सोही ठाउँका ३३ वर्षिय भिमबहादुर थापामगर र २५ वर्षीया विष्णु थापामगर छन् । मादक पदार्थ सेवनपछि भएको झगडामा लाठी प्रहारबाट थापाको मृत्यु भएको प्रहरी अनुसन्धानले देखाएको छ। आरोपित दुवैले घटनामा आफूहरुको संलग्नता स्वीकारेको जिल्ला प्रहरी कार्यालय, बागलुङका प्रहरी उपरीक्षक चन्द्रकुबेर खापुङले बताए। मादक पदार्थ सेवन गरेका होटल संचालक भीम बहादुर र विष्णु, मृतक कृष्णबहादुर बीचको झगडा हात हालहालको अवस्थामा पुगेको प्रहरीले जनाएको छ । भाई पर्ने विष्णुको पक्ष लिई भिमबहादुरलाई कुटपिट गरेका कृष्णबहादुरलाई पछि भिमबहादुरले टाउकोमा लाठी प्रहार गरेको अनुसन्धानको क्रममा खुलेको छ । प्रहरीले यसअघि घटनामा संलग्न रहेको आशंकामा पक्राउ गरेका दुई पुरुष र एक महिलालाई भने रिहा गरेको छ । घटना सुनियोजित जस्तो नदेखिए पनि मादक पदार्थ सेवनकै कारण भएको देखिन्छ उपरीक्षक खापुङले भने ‘घटनाबारे थप अनुसन्धान चलिरहेको छ, पक्राउ परेका दुवैले संलग्नता स्वीकारेका छन् ।’ आरोपित दुवैलाई थुनामा राखी अनुसन्धान गर्न जिल्ला अदालत बागलुङले ७ दिनको म्याद थप गरेको जिल्ला प्रहरी कार्यालयले जनाएको छ।

Advertisement