खिलानाथ ढकाल

पोखरा, कार्तिक २९ ।नेपाल तरुण दलको पोखरामा जारी चौथो महाधिवेशनमा सभापति शेरबहादुर देउवा र वरिष्ठ नेता रामचन्द्र पौडेल तथा महामन्त्री शशांक कोइरालाको संयुक्त संयुक्त प्यानलले उम्मेदवारी दिने भएको छ। नेता कृष्णप्रसाद सिटौला समूह भागबन्डामा पदाधिकारी टुंगो लगाउन सहमतिमा नआएपछि देउवा-पौडेलले संयुक्त प्यानल बनाउने तयारी थालेका हुन्।

भ्रातृ संगठन नेपाल विद्यार्थी संघमा तथा नेपाल महिला संघमा एउटै प्यानल बनाएर चुनाव लडेको देउवा-सिटौला सहयात्रा तरुण दलमा भत्किएको छ। नेविसंघमा नैनसिंह महरलाई अध्यक्ष र महामन्त्रीमा कुन्दन अर्याल उठाएर देउवा–सिटौला समूहले पौडेल समूहलाई पाखा लगाएको थियो। महिला संघमा त देउवा-सिटौला समूहले ‘क्लिन-स्विप’ नै गरेको थियो।

नेपाली कांग्रेस भित्रका तिनै प्यानल बीच भागबन्डाको प्रयास यधपी जारी छ। त्यसैले निर्वाचन कार्यतालिका अझै सुरू हुन सकेको छैन।

नेताहरूका अनुसार पार्टी सभापति शेरबहादुर देउवाबाट जितजंग बस्नेतलाई अध्यक्ष बनाउँदै उपाध्यक्ष र महामन्त्री पद वरिष्ठ नेता रामचन्द्र पौडेल समूहलाई दिने लगभग सहमति भइसकेको छ। नेता सिटौलाले आफ्नो पक्षका उत्तम चापागाईंलाई अध्यक्षमा उठाउने तयारी गरेका छन्।

महामन्त्री र उपाध्यक्षमा बिपी कोइराला नाति सिद्धार्थ कोइराला र महामन्त्रीमा भूपेन्द्रजंग शाहीको नाम छ। दुईमध्ये को महामन्त्री र उपाध्यक्ष बन्ने तय भइसकेको छैन। सिद्धार्थ प्रकाश कोइरालाका छोरा तथा बलिउड अभिनेत्री मनिषा कोइरालाका भाइ हुन्। बाँकी ५० प्रतिशत केन्द्रीय सदस्य भागबण्डामा मिलाउने विषयमा दुबै पक्ष सहमतिनजिक छन्।

‘म उपाध्यक्ष वा महामन्त्रीमध्ये एकमा लड्ने हो, नेताहरूबाट सुझाव आएअनुसार म दुईमध्ये एक पद रोज्छु,’ महाधिवेशन स्थल पोखराबाट टेलिफोनमा कुरा गर्दै कोइरालाले  भने।

देउवा र पौडेल पक्षबाट अध्यक्ष, उपाध्यक्ष र महामन्त्रीमा आएका नाम बस्नेत, कोइराला र शाहीको निश्चित भइसकेको छ। ‘अध्यक्षमा मेरो नाममा एक किसिमले सहमति भइसकेको हो,’ देउवा पक्षका उम्मेदवार बस्नेतले भने, ‘बाँकी दुई पद के मा उहाँहरू उठ्ने हो, त्यसले निर्धारण गर्छ।’

भागबन्डामा तीनै पक्षको दाबी अधिकतम भएकाले दलको विधान संशोधन गर्ने विषयमा पनि छलफल चलिरहेको नेता रञ्जीत कर्णले जानकारी दिए। तरुण दलमा यसअघि एक उपाध्यक्ष, एक महामन्त्री मात्र रहने विधान थियो।

त्यसलाई संशोधन गरेर पदाधिकारी संख्या बढाउने विषयमा शीर्ष नेताहरू सकारात्मक छन्। त्यसबारे निष्कर्षमा पुग्न तरुण दलको निर्देशन समितिले छलफल गरिरहेको छ। नेता तथा रक्षामन्त्री बालकृष्ण खाँडको नेतृत्वमा रहेको निर्देशन समितिले छलफलबाट निष्कर्ष दिन निर्वाचन प्रक्रिया अगाडि बढाउने तयारी रहेको कर्णले बताए।

तर, सिटौला समूह सहमतिमा नआए विधान संशोधनको औचित्य नरहने देउवा–पौडेल समूहको ठहर छ। सिटौलाको चित्त बुझाएर सर्वसम्मतीमै जाने उद्देश्यले मात्रै विधान संशोधनमा निर्देशन समिति छलफलमा जुटेको बताइएको छ।

सिटौला पक्षलाई अन्तिम समयसम्म सर्वसम्मतीमा ल्याउन प्रयास गर्ने तर त्यो सम्भव नभए देउवा–पौडेल समूह निर्वाचनबाटै पदाधिकारी चयन गर्ने योजनामा छ।

‘हामीले धेरै नै प्रयास गर्यौं तर उहाँहरूले बार्गेनिङ गरेर समय खेर फालिरहनु भएकाले चुनावबाटै नतिजा निकालौं भन्ने मनस्थितिमा हामी पुगिसकेका छौं,’ दलको चुनावी मैदानमा रहेका कोइरालाले भने, ‘त्यसो हुँदा हाम्रो संयुक्त प्यानलले चुनाव लड्छ।’