नेपालगन्ज, १८ माघ । भारतको चेन्नर्इदेखि सिंगापुरसम्म समुन्द्रमा विच्छाइएको अप्टिकल फाइबरमा समस्या आएपछि नेपालको ‘इन्टरनेट स्लो’ भएको छ। केही दिनदेखि नेपालभित्र इन्टरनेट ढिलो चल्ने गरेका छन्।

भारतको एउटा मात्रै कम्पनीसँग मात्रै निर्भर रहेका केही कम्पनीको इन्टरनेटनै अवरुद्ध समेत भएको छ। इन्टरनेट सेवा प्रदायक संस्था क्लासीक टेकले ग्राहकसँग माफीमाग्दै एउटामात्र कम्पनीको इन्टरनेटमा भर पर्दा समस्या भएको बताउँदै वैकल्पिक उपायमार्फत अर्को कम्पनीसँग व्याण्डविथ खरीद गरी सेवा दिने जनाएको छ।

भारतको चेन्नाईदेखि सिंगापुरसम्मको समुन्द्रभित्रको फाइबर तारमा समस्या आएपछि इन्टरनेटमा समस्या आएको क्लासीक टेकका कार्यकारी प्रमुख प्रमेश खरेलले बताए। कम्पनीले इन्टरनेट सेवा अवरुद्ध भएको अवस्थामा आफ्नो ‘कोर सिस्टम’मा पनि अपग्रेड गरेका कारण केहि समस्या परेको जनाएको छ।
वर्ल्डलिंक र सुविसु केवलनेटमा पनि केहि समस्या आएको थियो । तर वैकल्पिक सेवा भएका कारण तल्लो तहसम्म असर नदेखिएको कम्पनीको दाबी छ।

भारतको विकल्पमा हङकङ, भारतहुँदै चीन र क्यानडावाट इन्टरनेटको व्यवस्था भएकोले ग्राहकलार्इ असर नगरेको सुविसु केवलनेटका प्राविधिक अधिकृत कृष्ण लामिछानेले बताए।
भारतबाट आएको फाइबरमा समस्या हुँदा नेपाल टेलिकमको इन्टरनेटमा समेत प्रभावित भएको थियो।टेलिकमका प्रवक्ता सहप्रवक्ता शोभन अधिकारीका अनुसार सोमबार एक घण्टा इन्टरनेटमा समस्या आएको थियो।
टेलिकमले तत्कालै वैकल्पिक बाटोमार्फत भारतीय कम्पनीसँग कुरा गरेर इन्टरनेट सुचारु गरेको अधिकारीले बताए।हाल नेपालमा १४ वटा कम्पनीले नेटवर्क सर्भिसको काम गरेका छन् जसमध्ये नेपाल टेलिकमले एक्लै ल्याएर बेच्ने गर्छ। नेपालमा इन्टरनेट ब्रोडव्याण्ड सेवा प्रदायक कम्पनी भारतर्फमात्र निर्भर हुँदा समस्या आउने गरेको दूरसञ्चार प्राधिकरणका प्रवक्ता मीनप्रसाद अर्यालले बताए।

नेपाल टेलिकमले भारतवाटमात्र इन्टरनेटको व्याण्डविथ ल्याउँदा समस्या परेको भन्दै चीनबाट ल्याउन लागिएको इन्टरनेट ल्याउन अझै केही महिना लाग्ने भएको छ।

इन्टरनेट ल्याउन नेपाल र चीनको सीमा केरुङसम्म अप्टिकल फाइबर विस्तारको काम सकिइसकेको छ।फाइबरको परीक्षण समेत भइसकेको छ। सहप्रवक्ता अधिकारीका अनुसार जनवरीदेखि नै चीनवाट इन्टरनेट ल्याइसक्ने योजना भएपनि चीनतर्फ अप्टिकल फाइबर टुटेकाले समस्या भएको हो। चिनियाँ पक्षले छिट्टो मर्मत गरेर इन्टरनेट दिने जानकारी टेलिकमलार्इ दिएको उनले बताए।

उनका अनुसार फाइबर बिच्छेद भएको स्थानमा हिमपात भएकोले मर्मतमा समस्या भएको छ। अधिकारीले एक महिनामा मर्मत सकेर चीनको इन्टरनेट नेपाल आउने अपेक्षा रहेको बताए।

---