नेपालगन्ज । कांग्रेस सभापति शेरबहादुर देउवाको ठाडो निर्देशनमा भरतपुर महानगरपालिका मेयर उम्मेद्वार दिनेश कोइरालाले उम्मेद्वारी फिर्ता लिए पनि मतपत्रमा रुख चिन्ह भने कायमै हुनेछ।

यस्तोमा कांग्रेसको चुनाव चिन्ह रुखले बढी मत पाए के होला?
उम्मेद्वार नभए पनि मतपत्रमा राष्ट्रिय दलको चुनाव चिन्ह कायम हुने जानकारी दिँदै निर्वाचन आयोगका प्रवक्ता सूर्यप्रसाद शर्माले उम्मेद्वार नभएको अवस्थामा चुनाव चिन्हले पाएको मत स्वतः बदर हुने बताए। यस्तोमा अवस्थामा दोस्रो बढि मत पाउने चुनाव चिन्हका उम्मेद्वार निर्वाचित घोषित हुनेछन्।

भरतपुरमा कांग्रेसले माओवादी मेयर उम्मेद्वार रेणु दाहाल र पोखरामा माओवादीले कांग्रेस प्रत्याशी रामजी कुँवरलाई सघाउने सहमति भएको छ। तर, दुबै स्थानको मतपत्रमा कांग्रेस र माओबादीको चुनाव चिन्ह भने कायम हुनेछ। यस्तोमा प्रतिबद्ध कार्यकर्ताले आफ्नै पार्टीलाई भोट हाल्ने आँकलन समेत गरिएको छ।

काँग्रेस र माओवादीले भरतपुर र पोखरा मात्र होइन हेटौँडा उपमहानगर, थाहा नगरपालिका लगायतमा पनि तालमेल गरेका छन्। यस्तै, एमाले र राप्रपाले काठमाडौं र ललितपुर महानगरपालिकामा तालमेल गरेका छन्। दुबै स्थानमा राप्रपाले एमाले मेयर र एमालेले राप्रपा उपमेयरलाई सघाउने सहमति छ। तर, पार्टीका उम्मेद्वार नरहे पनि मतपत्रमा दुबै दलको चुनाव चिन्ह भने हुनेछ।

---