नेपालगञ्ज,१३ जेठ। नेपालगञ्ज गोल्डकप फुटबल प्रतियोगिताको तेस्रो संस्करण यही जेठ २१ गतेदेखि २८ गतेसम्म खजुरा गाउँपालिकाको डि गाउँमा हुने भएको छ। टुबोर्ग तेस्रो नेपालगञ्ज गोल्डकप फुटबल प्रतियोगिता २०७५ नाम दिइएको प्रतियोगितामा देशभरका ८ टिमको सहभागिता रहने आयोजक बाँके जिल्ला फुटबल संघले जनाएको छ ।

Advertisement

संघले आज नेपालगञ्जमा पत्रकार सम्मेलन गरी प्रतियोगिता बारे जानकारी गराएको हो । प्रतियोगितामा नेपालगञ्ज ११, सुदुरपश्चिम ११, लाली रुपन्देही ११, सशस्त्र प्रहरीको एपिएफ क्लब, नेपाली सेनाको त्रिभुवन आर्मी क्लब, संकटा क्लब, भारतको पञ्जाब ११ र च्यासल फुटबल क्लब काठमाण्डौले प्रतियोगितमा सहभागिता जनाउने बाँके जिल्ला फुटबल संघका अध्यक्ष भोजराज शाहीले जानकारी दिनुभयो ।

डिगाउँस्थित नेपाल राष्ट्रिय आदर्श आधारभूत विद्यालयको खेल मैदानमा हुने प्रतियोगिताको विजेताले ५ लाख र उपविजेतालाई २ लाख ५१ हजार रुपैयाँ नगद पाउनेछन् । प्रतियोगिताको उत्कृष्ट खेलाडीलाई मोटरसाइकल प्रदान गरिनेछ । ७५ लाखको लागतमा हुन लागेको प्रतियोगिता यसअघि नेपालगञ्ज रंगशालामा हुने भनिए पनि आठौं राष्ट्रिय खेलकुद प्रतियोगिताको तयारीका लागि रंगशालाको निर्माण कार्य चलिरहेकाले अन्तिम समयमा आएर स्थगित भएको थियो ।