नेपालगञ्ज । डाक्टरहरुको आन्दोलनका कारण सरकारी अस्पतालहरुको सेवा ठप्प भएको छ । डाक्टरहरु नै आन्दोलमा उत्रिएपछि बिरामीहरु स्वास्थ्य सेवा पाउनबाट बञ्चित भएका छन् । स्वास्थ्य सेवा नपाउँदा अस्पताल पुगेका विरामीहरु मर्कामा परेका छन् ।

Advertisement

नेपालगञ्जको भेरी प्रादेशिक अस्पतालमा पनि आजदेखि आकस्मिक बाहेकका सबै सेवा ठप्प भएको छ । देशभरका सरकारी डाक्टरले आजदेखि आकस्मिक बाहेकका सबै सेवा बहिस्कार गरेपछि बिरामीको उपचार प्रभावित भएको हो । कर्मचारी समायोजन विधेयकमा आफूलाई अन्याय गरेको भन्दै विधेयक सच्याउन माग गर्दै आएका डाक्टरले आजदेखि आकस्मिक बाहेकका कक्षमा काम बहिस्कार गरेका हुन् ।

सरकारी चिकित्सक संघ (गोदान)का अध्यक्ष दिपेन्द्र पाण्डेले थोरै रहेका सरकारी डाक्टरलाई सेवा सुविधा दिएर सरकारी सेवाप्रति आकर्षित गर्नुको साटो झन् निरुत्साहित पार्न खोजेको भन्दै आन्दोलन गर्नुपरेको बताउनुभयो ।