नरैनापुर(बाँके) । बाँकेको नरैनापुर गाउँपालिकामा सामाजिक सद्भावका लागि सांस्कृतिक कार्यक्रम गरिएको छ । कार्यक्रममा करिब ३  दर्जन कलाकारद्वारा  एकल तथा सामूहिक नृत्य प्रस्तुत गरिनुका साथै गीत, गजल र मुक्तकहरु पनि वाचन गरिएका थिए । ठूलो संख्यामा उपस्थित स्थानीयहरुले कार्यक्रममा भरपुर मनोरञ्जन लिएका थिए ।

Advertisement

कार्यक्रमका प्रमुख अतिथि गाउँपालिकाका अध्यक्ष इस्तियाक अहमद शाहले सामाजिक सद्भावका लागि आफू सदैव क्रियाशील रहेको बताउँदै विभिन्न जातजाति, भाषाभाषी, धर्म सम्प्रदायको बसोबास रहेको नरैनापुरलाई आफूले सद्भावको गाउँपालिका बनाउन लागिपरेको बताउनुभयो । आपसी सद्भाव, भाइचारा र भ्रातृत्वको भावनाले विकासको मार्ग प्रशस्त गर्न सहयोग गर्ने भन्दै गाउँपालिका अध्यक्ष शाहले केही महिना अघि स्थानीय तहहरुमा जिल्लामै पहिलोपटक नरैनापुरले सद्भावका लागि सहभोज कार्यक्रमको समेत आयोजना गरेको बताउनुभयो ।

विशिष्ट अतिथि नेपालगञ्ज उपमहानगरपालिका वडा नम्बर ४ का वडा अध्यक्ष मोहम्मद सफिक बेहनाले दुर्गम क्षेत्रको पहिचान बोकेर हिँडेको नरैनापुर पछिल्लो समय विकास पथमा लम्किँदै गरेकोमा खुसी ब्यक्त गर्नुभयो । शिक्षा नै बृत्ति विकासको आधार भएको बताउँदै अध्यक्ष बेहनाले आफ्ना बालबालिकालाई विद्यालय पठाएर उज्ज्वल भविष्यका निम्ति प्रेरित गर्न आग्रह गर्नुभयो ।

नरैनापुरको विकासका लागि गाउँपालिका अध्यक्ष शाहले खेलिरहेको भूमिका र लगाबको उच्च प्रशंसा गर्दै उहाँले सबैको साथ र सहयोगले केही बर्षभित्रै नरैनापुरको मुहार फेरिने विश्वास ब्यक्त गर्नुभयो । अध्यक्ष बेहनाले सामाजिक सद्भाव कायम राख्न सबैको भूमिका जरुरी हुने बताउनुभयो । गाउँपालिकाका प्रमुख प्रशासकीय अधिकृत दल बहादुर बस्नेतले सामाजिक सद्भाव कायम राख्नका लागि सबैलाई प्रेरित गर्दै गाउँपालिकाबासीलाई मनोरञ्जन प्रदान गर्न सांस्कृतिक कार्यक्रम गरिएको बताउनुभयो ।

उहाँले नरैनापुरको विकासका लागि सबै दत्तचित्त भएर लाग्नुपर्नेमा जोड समेत दिनुभयो ।गाउँपालिकाको सहयोग एवम् संस्कृति मिडिया नेटवर्कको आयोजनामा गरिएको सांस्कृतिक कार्यक्रम करिब साढे ३ घण्टा चलेको थियो। सांस्कृतिक कार्यक्रमको सभापतित्व संस्कृति मिडियाकी निर्देशक राधा रेग्मीले गर्नुभएको थियो भने कार्यक्रमको सञ्चालन कमल विके निर्मोहीले गर्नुभएको थियो।

कार्यक्रममा नरैनापुर गाउँपालिका २ का अध्यक्ष मन्शुद शाह, ३ का अध्यक्ष राजकुमार मौर्य, ४ नम्बरका अध्यक्ष  दिनेश शर्मा लगायत नेपाल्गन्ज वडा नम्बर ४ का समाजसेबि महोमद सलिम मुसलमान समेतको उपस्थिति रहेको थियो।