घोराही(दाङ)। केही समय अघि अब्यबस्थित रहेका दाङ घोराहीका मासु पसलहरु अब भने ब्यबस्थित देखिएका छन्।घोराही उपमहानगरपालिका पशु सेवा शाखाले गरेको मासु पसलहरुको अनुगमनका क्रममा सुधारोन्मुख हुँदै गएको देखिएको हो ।

Advertisement

यस अघिका अनुगमनका क्रममा पटक पटक सुुधार गर्न निर्देशन दिदै आएपछि व्यवसायीहरुले मासु पसल सञ्चालन मापदण्ड अनुसार नै सुधार थालेको पाईएको छ । यसअघि पसल बाहिरै छरपष्टरुपमा मासुहरु झुण्ड्याउने, फलामको रडहरु प्रयोग गर्ने, फ्रिज प्रयोग नगर्ने, सफाई नगर्ने, दर्ता नगर्ने प्रवृत्ति हट्दै गएको र सुधारोन्मुख अवस्थामा पसलहरु रहेको पाईएको छ ।

सबै पसलहरुलाई अनिवार्यरुपमा दर्ता गर्न, खुल्ला मासु नराख्न, झुण्ड्याउँदा फलामको रड प्रयोग नगर्न, सीसा वा जालीको प्रयोग गरेर मासु बेच्न, सरसफाई अनिवार्य गर्न, मूल्य सूचि अनिवार्य राख्न र डि फ्रिजको प्रयोग गरि मासु राख्ने कार्यलाई निरन्तरता दिन अनुगमन टोलिले निर्देशन दिएको छ ।

अनुगमन टोलीले रांगाका १०, खसीका ८, बंगुरका २ र डेरी पसल २ गरी २२ वटा पसलको अनुगमन गरेको छ । मानव स्वास्थ्यसँग प्रत्यक्ष जोडिने मासु व्यवसायलाई स्वच्छ र व्यवस्थित ढंगले बिक्री वितरण गर्नुपर्ने नगर कार्यबाहक प्रमुख सीता सिग्देल न्यौपानेले सुझाब दिनुभयो।