नेपालगन्ज । गएराती देखि परेको बर्षाले बाँकेको  राप्ती नदीमा पानीको सतह बढेको छ ।  सतह ‘डेन्जर जोन ’ नजिक पुग्दै गएको छ।राप्ती नदीको सतह आज दिउसो सम्ममा ४ मिटर ५० सेन्टीमिटर पुगेको छ । नदीमा ५ मिटर पानीको सतह पुगेपछि तटीय क्षेत्रका बासिन्दालाई बाढीको सूचना दिने गरिन्छ । ५ मिटर ४० सेन्टीमिटरलाई डेन्जर मानिन्छ । यति सतह पुग्ने बित्तिकै साइरन बजाएर तटीय क्षेत्रका बासिन्दालाई उच्च ठाउँमा बस्न पठाइन्छ ।

Advertisement

कुसुमस्थित नदी मापन केन्द्रका गेजरिडर भद्रबहादुर थापाका अनुसार, राप्ती नदीमा पानीको सतह बढ्दै गइरहेको छ । बुधबार विहान ६ बजे २ मिटर ५५ सेन्टीमिटर रहेको पानीको सतह ११ बजे ४ मिटर ५० सेन्टीमिटर पुगिसकेको छ । पहाडी जिल्लामा भारी वर्षा भएकाले नदीमा पानीको सतह बढ्दै गइरहेको छ । प्यूठान र रोल्पामा पानी पर्दा राप्ती नदी बढ्ने गर्दछ ।

यसपाली राप्ती नदीको सतह ६ मिटरसम्म पुगेको छ । असार २९ गते नदीमा पानीको सतह ६ मिटर मापन गरिएको थियो । तथापि, नदी गाउँ पसेन । कुसुममा ६ मिटर मापन गरिएको पानी तटीय क्षेत्रमा आइपुग्दा फैलिएकाले डुवान हुन नपाएको जानकारहरु बताउँछन् ।कुसुमदेखि तटीय क्षेत्र होलिया, बेतहनीसम्म पानी आउनलाई ४/५ घण्टा लाग्छ । पछिल्लो वर्षहरुमा नदीले धार परिवर्तन गरेको छ ।