नेपालगञ्ज । नेपालगञ्जको राँझा एयरपोर्ट नजिकै रहेको किमु कटेजमा छापा मारेर प्रहरीले आज केही युवा युवतिलाई आपत्तिजनक अवस्थामा पक्राउ गरेको छ । इलाका प्रहरी कार्यालय कोहलपुरबाट डिएसपी रमेश बहादुर सिंहको कमाण्डमा गएको प्रहरी टोलीले आज अपरान्ह सवा ४ बजेतिर नेपालगञ्ज उपमहानगरपालिका वडा नम्बर २० मदनापुरमा रहेको किमु कटेजबाट आपत्तिजनक अवस्थामा ३ जोडी युवा युवतिलाई पक्राउ गरेको हो । अवैध यौनजन्य क्रियाकलाप हुँदै आएको सुराकी पाएको प्रहरीले आज छापा मार्दा आपत्तिजनक अवस्थामा ती जोडीलाई पक्रेको हो । ‘लामो समयदेखि यौन क्रियाकलाप गराउँदै आएको भन्ने सूचना हामीलाई स्थानीयबाटै आएको थियो, आज कटेजमा छापा मार्दा ३ जोडी युवा युवतिलाई आपत्तिजनक अवस्थामा रंगेहात पक्राउ गरेका छौं,’ डिएसपी सिंहले भन्नुभयो । कटेजका सञ्चालक मिलन थापालाई पनि पक्राउ गरिएको सिंहले जानकारी दिनुभयो । उनीहरुले गल्ती महसुस गरेमा सम्झाई बुझाई एक पटकलाई छाड्ने तर त्यसो नभए मुद्दा नै चलाउने डिएसपी सिंहले बताउनुभयो । ज्ञानदिप मावि डलैपुर नजिकै रहेका बेला अवैध यौन क्रियाकलाप हुने गरेको भन्दै स्थानीयले व्यापक विरोध गरेपछि उक्त कटेज मदनापुर सरेको थियो । तर, त्यहाँ पनि निरन्तर अवैध यौन क्रियाकलाप हुने गरेको स्थानीयले बताउँदै आएका थिए । कटेजका बारेमा व्यापक जनगुनासोपछि प्रहरीले छापा मार्दा रंगेहात केही जोडी पक्राउ परेपछि स्थानीयको आरोप पुष्टि भएको छ ।

Advertisement