सुर्खेत ।सुर्खेतको हर्रेमा भएको बस दुर्घटनामा मृत्यु भएका तीन जना मध्य एक जनाको सनाखत भएको सुर्खेत प्रहरीले जानकारी दिएको छ।
भेरीगंगा नगरपालिका ५ हर्रे मोडमा आज  बिहान ना ४ ख ९३१७ नम्बरको  बस दुर्घटनामा मृत्यु भएका तीन जनामध्ये एक जनाको सनाखत भएको छ।जाजरकोटको बारेकोट गाउँपालिका ७ की २५ वर्षीया लक्ष्मी बस्नेतको सनाखत भएको हो। अरु दुई जनाको सनाखत हुन बाँकी रहेको जिल्ला प्रहरी कार्यालय सुर्खेतले जनाएको छ। जाजरकोटबाट नेपालगञ्ज जाँदै गरेको भेरीगंगा यातायात समितिको ना४ख ९३१७ नम्बरको बस सडकबाट १०० मिटर तल खसेको थियो।

Advertisement

दुर्घटनामा चालक सल्यानको कुपिण्डे दह नगरपालिका ११ का २३ वर्षीय खिमबहादुर विकसहित ३१ जना घाइते भएको जिल्ला प्रहरी कार्यालयका प्रवक्ता प्रहरी नायब उपरीक्षक रवि बरालले जानकारी दिए।

उनका अनुसार डोल्पाको त्रिपुरासुन्दरी नगरपालिका ६ का रामबहादुर बोहरा, रुकुमको आठविसकोट नगरपालिका ९ की ललिता खड्का, डोल्पाको नर्कुकालिका गाउँपालिका ५ का कर्ण बूढा, रुकुमको चौजाहारी नगरपालिका २ का टीकाप्रसाद गौतम, जाजरकोटको नलगाड नगरपालिका २ का चंखे वादी, रुकुमको आठबिसकोट नगरपालिका ६ का जनक बोहोरा, सोही ठाउँका ४ वर्षीय बालक सूर्यकान्त बोहोरा, जाजरकोटको नलगाड नगरपालिका १३ का रामबहादुर शाही घाइते भएका छन्।

यस्तै, रुकुम आठबिसकोट नगरपालिका–६ का कर्ण बहादुर विक, कुमारी विक, भारतको बहराइजका बुद्दुखा गुजरान, जाजरकोटको नलगाड नगरपालिका २ का तिला वादी, एक वर्षीया बालिका स्मारिका वादी, १२ वर्षीया सन्ध्या वादी, रुकुमको आठबिसकोट नगरपालिका  १३ का तस्बिस नेपाली, सानोभेरी गाउँपालिका–५ का लालबहादुर बस्नेत, आठबिसकोट नगरपालिका१४ का इन्द्र प्रकाश मल्ल, जाजरकोटको नलगाड नगरपालिका २ का गोविन्द वादी, मदन वादी, बारेकोट गाउँपालिका ७ की रेश्मा सिंह बस्नेत, ७ महिने नाबालिका सुस्मिता बस्नेत, ७ वर्षीय तारा बस्नेत घाइते भएका डिएसपी रावलले जानकारी दिए।उनीहरूको कोहलपुर मेडिकल कलेजमा उपचार भइरहेको उनले जानकारी दिए।

यसैगरी घाइते भएका डोल्पाको मुड्केचुला गाउँपालिका ७ का धिरज बुढा, दैलेखको चाम्मुण्डा विन्द्रासैनी नगरपालिका–९ की सपना मल्ल, दुई वर्षीया बालिका जेनिशा थापा, बसका सहचालक रुकुमको आठबिसकोट नगरपालिका ११ का भोला परियार, डोल्पाको मुड्केचुला गाउँपालिका–१ का कमल शाहीको नेपालगञ्ज नर्सिङ होममा उपचार भइरहेको छ।घटनास्थलमा नाम नखुलेका अन्दाजी डेढ वर्षीय बालक सकुशल फेला परेको र प्रहरीको साथमा राखिएको डिएपी रावलले जानकारी दिए।