नेपालगञ्ज:नेपाली कांग्रेस निर्वाचन प्रचार प्रसार समिति नेपालगञ्जले ‘समृद्ध नेपालगञ्ज’को अठोटसहितको प्रतिबद्धता पत्र आज (बुधबार) सार्वजनिक गरेको छ । नेपाली कांग्रेसका तर्फबाट नेपालगञ्ज उपमहानगरपालिकाका मेयरका उम्मेदवार डा. सुरेश कुमार कनौडिया र उपमेयरका उम्मेदवार उमा थापा मगरको अठोटका रुपमा सार्वजनिक गरिएको प्रतिबद्धता पत्रमा ‘५ बर्षमा ५ प्रतिबद्धता’ समेटिएको छ । नेपालगञ्जलाई समुन्नत सहरका रुपमा विकास गर्ने लक्ष्यसहितको प्रतिबद्धता पत्रमा भौतिक विकास, आर्थिक समृद्धि, जीवनस्तर प्रबद्र्धन, सांस्कृतिक बहुआयामिकता र सामाजिक न्याय तथा सुशासनका क्षेत्रमा विभिन्न प्रतिबद्धता जनाइएको छ । डुबानको समस्या झेल्दै आएको नेपालगञ्जलाई ‘कहिल्यै नडुब्ने नेपालगञ्ज बनाउने’ अठोट प्रतिबद्धता पत्रमा छ । नेपालगञ्जलाई प्लाष्टिक मुक्त नगरको पहिचान दिँदै व्यापक बृक्षारोपण मार्फत् ‘ग्रिन सिटि’ को रुपमा विकास गर्ने, चक्रपथ निर्माण गर्ने, सुख्खा बन्दरगाहको सञ्चालन प्रक्रियालाई तिब्रता दिने, सार्वजनिक निजी साझेदारीलाई प्रोत्साहन गर्दै नगरमा बृहत् सभागृह, सहकारी बैंक, कोल्ड स्टोर, खेल मैदान, क्रियापुत्री घर, शबदाह गृह र कब्रिस्तान आदि निर्माण गरी सञ्चलान गर्ने प्रतिबद्धता जनाइएको छ । आर्थिक समृद्धिको बाटोमा नेपालगञ्जलाई डो¥याउन दिगो विकास सहितको औद्योगिक समृद्धिको खाका कोर्ने, सहुलियत दरमा लिज–पर्चेजको व्यवस्था मिलाउने, नेपालगञ्जलाई पर्यटकीय हबका रुपमा विकास गर्ने, युवा स्वरोजगारीलाई बढावा दिन सहुलियत ऋण, व्यवसायिक तालिम, सिपमूलक शिक्षाको व्यवस्था गरी बैदेशिक रोजगारमा जान पर्ने बाध्यताको अन्त्य गरिने प्रतिबद्धता पत्रमा उल्लेख छ । त्यस्तै जीवनस्तर प्रबद्र्धनका क्षेत्रमा स्वच्छ र प्रशोधित खानेपानीको व्यवस्था, भेरी अञ्चल अस्पताललाई मल्टी स्पेसियालिटी रिफरल अस्पतालको रुपमा विकास गरी प्रदेशका साथै देशकै नमुना अस्पताल बनाउने, जलेका विरामीहरुका निम्ति पुनःस्थापना केन्द्र, अपाङ्गगता भएकाहरुका लागि होस्टेलको व्यवस्था, अन्तिम चरणका क्यान्सर रोगीहरुका लागि ‘होस्पिस’को व्यवस्था गरिने प्रतिबद्धता जनाइएको छ । त्यसैगरी मदरसाहरुलाई राज्यको मूल प्रबाहको शिक्षा प्रणालीसंग समायोजन गर्ने, मुख्य तथा संवेदनशील चोकहरुमा सिसिटिभी क्यामेरा जोड्ने, खुला आकाशमुनि बस्न बाध्य जीवनको अन्त्य गर्ने मेयर उपमेयरका प्रतिबद्धता पत्रमा उल्लेख छ । सांस्कृतिक बहुआयामिकता अन्तर्गत् सामाजिक सद्भावलाई प्रगाढ बनाउने, मठमन्दिर, मस्जिद, चर्च, धर्मशाला, कर्वला क्षेत्रको संरक्षण, सम्बद्र्धन तथा प्रबद्र्धन गर्ने, सार्वजनिक जग्गाको पहिचान गरी त्यसको अधिकतम् प्रतिफल आउने गरी व्यवस्थापन गर्ने, विभिन्न धर्मका धर्माबलम्वी र तीर्थ यात्रीका लागि धर्मशाला निर्माण गर्ने अठोट नेपाली कांग्रेसका मेयर उपमेयरका उम्मेदवाहरुको छ । सामाजिक न्याय तथा सुशासन अन्तर्गत् मेयरको तलबभत्ता सामाजिक कार्यमा खर्चिने, भ्रष्टाचारमा शुन्य सहनशिलताको नीति अख्तियार अंगिकार गर्ने, सूचनाको हकलाई प्रभावकारी बनाउने, प्रत्येक वडामा सूचना केन्द्रको स्थापना गरिने, निःशुल्क कानुनी सेवा प्रदान गर्ने, सामाजिक सुरक्षा भत्ता घर घरमै उपलब्ध गराउने प्रतिबद्धता जनाइएको छ ।
काँगे्रस हारे विकास र समृद्धि हार्ने
नेपालगञ्ज, नेपाली कांग्रेसका नेताहरुले नेपाली कांग्रेसले पराजय ब्यहोरेमा नेपालगञ्जको विकास र समृद्धि रोकिने भन्दै उम्मेदवारलाई हार्ने छुट नभएको बताएका छन् । कांग्रेसीहरु एक ढिक्का भएर हरेक तहमा आफ्ना उम्मेदवारहरुलाई जिताउने महाअभियानमा जुट्नुको विकल्प नभएको नेताहरुले बताए । नेपालगञ्ज उपमहानगरपालिकामा नेपाली कांग्रेसका तर्फबाट मेयरका उम्मेदवार डा. सुरेश कुमार कनौडिया र उपमेयर उमा थापा मगरको प्रतिबद्धता पत्र सार्वजनिक कार्यक्रममा बोल्ने नेताहरुले नेपाली कांग्रेसको समृद्धिको अभियानलाई गति दिन नेपाली कांग्रेसले जित्नुको विकल्प नभएको बताए । नेपाली कांग्रेस बाँकेकी सभापति किरण कोइरालाले पार्टीलाई जिताउन कार्यकर्तालाई आह्वान गर्नुभयो । ‘कांग्रेसले जे बोल्छ त्यही गर्छ, जे गर्दैन त्यो बोल्दैन’ सभापति कोइरालाले भन्नुभयो, ‘नेपालगञ्जलाई समृद्ध शहर बनाउने भोक भएका दुई सक्षम व्यक्ति डा. कनोडिया र उमालाई जिताऔं, नेपालगञ्जले मुहार नै फेर्नेछ ।’
काँगे्रस नेतृ एवं सांसद् डा. आरजु राणा देउवाले कांग्रेसले हारेमा समृद्धिको बाटो नै अबरुद्ध हुने भन्दै सबै एक ढिक्का भएर कांग्रेसलाई जिताउन आग्रह गर्नुभयो । उहाँले भन्नुभयो, ‘३ सय ६४ दिन कांग्रेस अनि ६५औं दिनमा अरु कुनै बन्ने प्रबृत्ति त्यागौं, कांग्रेसका उम्मेदवारलाई जिताउन एक बनौं ।’ काँग्रेस ठूलो पार्टी भएकाले आकांक्षी धेरै हुनु स्वभाविक भएको भन्दै नेतृ राणाले नेपालगन्जको विकासमा डा.सुरेश कनोडिया नेतृत्वको टिमलाई जिताउनुको विकल्प नभएको वताउनुभयो । ‘एउटा सम्पन्नशाली व्यक्ति सबै सुखसयल छाडेर समाज सेवाका लागि समर्पित भएको छ यो रहरले होइन उहाँले भन्नुभयो–‘नगरवासीको सेवाको लागि हो भनेर बुझ्दिन म कार्यकर्ताहरुलाई आग्रह गर्न चाहान्छु ।’ मेयरका उम्मेदवार डा. कनौडियाले समृद्ध नेपालगञ्जको खाका आफूसंग भएकाले जिताउन आग्रह गर्नुभयो । ‘आफूहरुले जे गर्न सक्छौं, जनताको मनोभावना जे हो, त्यही अनुसार प्रतिबद्धता व्यक्त गरेका छौं, गर्न नसकिने केही छैन, हामीलाई जिताउनुहोस्, नेपालगञ्जको मुहार फेर्ने जिम्मा हाम्रा हो ।’ डा. कनौडियाको भनाई थियो । दृढ इच्छाशक्तिका साथ काम गर्ने भोक आफूमा भएकाले काम गर्ने अवसर दिन आफूलाई जिताउन उहाँले आग्रह गर्नुभयो । उपमयरकी उम्मेदवार थापाले नमुना नेपालगञ्ज बनाउने भिजनका साथ आफूहरुले प्रतिबद्धता पत्र सार्वजनिक गरेकाले गर्न नसकिने केही पनि नभएको बताउनुभयो । ‘तपाईंहरु हामीलाई जिताउनुस्, नेपालगञ्ज बनाउने जिम्मा हाम्रो’ थापाले भन्नुभयो । आफू पत्रकारिता क्षेत्रबाट आएकाले पत्रकारहरुलाई प्रोत्साहन गर्न आफूले जितेमा आफ्नो तलब भत्ताबाट ‘पत्रकार अक्षयकोष’ स्थापना गर्ने घोषणा पनि उहाँले गर्नुभयो । नेपालगञ्ज उपमहानगरपालिकाको स्थानीय तह निर्वाचन प्रचार प्रसार समितिका संयोजक सुरेन्द्र हमालले प्रतिबद्धता पत्र पढेर सुनाउनुभएको थियो । नगर सभापति प्रशान्त विष्टको सभापत्विमा सम्पन्न समारोहमा पार्टी सचिव कपिलदेव शर्माले स्वागत गर्नु भएको थियो । कार्यक्रममा सांसदहरु बादशाह कुर्मी, अब्दुल हमिद सिद्दिकी भोला, आशा विक, मैकुलाल बाल्मीकि, सर्वतारा खातुन, पूर्व सभाषद मोहम्मदी सिद्दिकी, पूर्व सांसद कृष्णसिंह परिवार, नेपाल महिला संघका केन्द्रिय सदस्य मञ्जु खाँड, पार्टीका पूर्व जिल्ला सभापतिहरु, क्षेत्रीय सभापतिहरु, महासमिति सदस्यलगायतको उपस्थिति रहेको थियो ।
फोरम वडाध्यक्ष सहितको प्यानल काँग्रेसमा प्रवेश
नेपालगञ्ज, संघिय समाजबादी फोरमबाट नेपालगन्ज उपमहानगरपालिका वडा नम्बर १२का वडाध्यक्ष सहितको ५ जनाको प्यानल आज नेपाली काँग्रेसमा प्रवेश गरेका छन् । पार्टी प्रबेश गर्नेहरुमा संघिय समाजबादी फोरमबाट वडा नं १२ का वडा अध्यक्ष पदका उम्मेदवार फरहान हुसेन खाँन , वडा सदस्यका उम्मेदवार महिला सदस्य मुन्नी देवी बर्मा , सदस्य किस्मतुल खाँ, डेढराम अहिर र समशुल भङगी सहितका आफ्नो पार्टी परित्याग गरि नेपाली काँग्रेसमा प्रवेश गरेका हुन् । उनीहरुसंगै वडा नं ९ बाट एमाले समर्थक गोपाल थापा लगायत दर्जन बढि नेपाली काङग्रेसमा प्रवेश गरेका हुन् । उनीहरुलाइ नेपाली काँग्रेसकी नेतृ तथा सांसद डा. आरजु देउवा , नेपाली काँग्रेस बाँकेका सभापति किरण कोइराला, नेपाल महिला संघका केन्द्रिय सदस्य मञ्जु खाँड , नेपाली काँग्रेस नेपालगन्ज उपमहानगरपालिका प्रचार प्रसार संयोजक सुरेन्द्र हमाल , मेयर उम्मेदवार डा.सुरेश कुमार कानोडिया लगायतले नेपाली काँग्रेसको रुख चिन्ह अंकित गम्छा ओडाएर पार्टी प्रवेश गराउनुभएको थियो ।
पार्टी प्रवेशमा बोल्दै संघिय समाजबादी फोरमबाट वडा नं १२ का वडा अध्यक्ष पदका उम्मेदवार फरहान हुसेन खाँनले नेपाली काँग्रेसको निति र सिद्धान्त आफूलाइ मन परेकाले नेपाली काँग्रेसमा प्रवेश गरेको बताउनुभयो । लामो समय मद्येसबादी दलमा लागे तर त्यसले निति अनुरुपको काम नगरेकाले पार्टी परित्याग गरेको बताउनुभयो । बुझ्दै जाँदा पुरानो र जनताको पार्टी काँग्रेस बाहेक अरु नदेखेकाले अब आजिवन काँग्रेसमै लाग्ने प्रतिबद्धता समेत व्यक्त गर्नुभयो । यस्तै बैजनाथ गाउँपालिकामा विभीन्न पार्टीका एक सय भन्दा बढि कार्यकर्ताहरु नेपाली काङग्रेसमा प्रवेश गरेका छन् । नेपाली काङग्रेशको विचार तथा सिद्धान्त मन पराएर आउनेलाई स्वागत गर्दै खादा ओढाएर पार्टी प्रबेश गराइएको बैजनाथ गाउँपालकिाका प्रमुख पदका उम्मेदवार देव बहादुर खत्रीले बताउनुभयो । वडा नं ८ मा स्थित पेडारीमा भएको बृहत कार्यक्रममा हजारौ कार्यकर्ताको उपस्थिती रहेको थियो ।

Advertisement