दैलेख,१२  मंसिर  । दैलेखमा आज बिहान जीप दुर्घटना हुँदा चार जनाको ज्यान गएको छ । चार जना घाइते भएका छन् ।

Advertisement

सुर्खेतबाट दैलेखको ठाँटीकाँधतर्फ गइरहेको लु२च २२०७ नम्बरको जीप ठाँटीकाँध गाउँपालिका ३ डांग्रेमा दुर्घटना भएको हो ।

दुर्घटनामा परी ठाटीकाँध गाउँपालिका १ का ३० वर्षीय निर्मल बम, वडा नम्बर २ का जीप चालक रमेश शाही, वडा नम्बर ४ की रत्ना शाही र राजेन्द्रबहादुर शाहीको ज्यान गएको दैलेखका प्रमुख जिल्ला अधिकारी लक्ष्मीप्रसाद बास्कोटाले जानकारी दिनुभयो । बास्कोटाका अनुसार दुई जनाको घटनास्थलमै र दुई जनाको उपचारका लागि सुर्खेत लैजाँदै गर्दा बाटोमै ज्यान गएको हो ।
निजी जीप ठाँटीकाँध पुग्नुभन्दा करिब एक दुई किलोमिटर बाँकि छँदा दुर्घटनामा परेको हो । जीप कच्ची सडकबाट करिब २ सय मिटर तल भीरमा खसेको थियो । दुर्घटनामा घाइते भएका चारै जनाको अवस्था गम्भीर छ । उनीहरुलाई उपचारका लागि सुर्खेत पठाइएको छ ।