बाजुरा,२१ मार्तडी। सुदूरपश्चिम प्रदेशका पहाडी तथा हिमाली जिल्लाका स्थानीय तहमा कर्मचारी अभावका कारण जनताले सास्ती भोग्दै आएका छन् । 

स्थानीय तहको निर्वाचन सम्पन्न भएको डेढवर्ष बितेको छ । स्थानीय तहसँगै प्रदेश र सङ्घीयताको निर्वाचन भएको पनि लामो समय बितिसक्यो । तर सुदूरपश्चिम प्रदेशका पहाडी तथा हिमाली जिल्लाका अधिकांश स्थानीय तहमा सचिव तहका कर्मचारी नहुँदा सेवाग्राही समस्यामा परेका हुन् । 

तीन तहको निर्वाचन सम्पन्न भएको लामो समय बित्दा पनि स्थानीय तहले कर्मचारी नपाउँदा जनताले दुई दिन पैदल हिँडेर सेवा लिनुपरेको त्रिवेणी नगरपालिका–७ का गीता साउदले गुनासो गर्नुभयो । 

उहाँले गाउँ÷गाउँमा सिंहदबार आएको आफूले महसुस नगरेको उल्लेख गर्दै गाउँ÷गाउँमा सिंहदरबार पुगेको भन्ने गरिन्छ, तर सार्वजनिक सेवा लिन भने दुई दिनको पैदलबाटो हिडनुपर्ने बाध्यता रहेको बताउनुभयो । 

जिल्लाका नौ स्थानीय तहमा चार नगरपालिका र पाँच गाउँपालिका छन् । तीमध्ये ६९ वडाका ५५ भन्दाबढी वडामा कर्मचारी नहुँदा सचिवको कामकाज जनप्रतिनिधीले झोलामा कार्यालयका सामान बोकेर सेवा दिनु परेको त्रिवेणी नगरपालिका–७ का वडा अध्यक्ष प्रेम थापाले बताउनुभयो । 

त्रिवेणी नगरपालिकाका स्थानीयवासीलाई वडाबाट पाउने सेवा सुविधा लिन दुई दिनको पैदलयात्रा हिँडेर सेवा लिनुपर्ने बाध्यता छ । वडा कार्यालयमा खरिदार तहको कर्मचारी नहुँदा सोही नगरपालिका– १ साविकको छतारा गाविसमा गएर सेवा लिनुपर्ने समस्या रहेको छ । 

उहाँले दिएको जानकारी अनुसार वडावासीले वडामै जन्मदर्ता, विवाहदर्ता, मृत्युदर्ता र जग्गाको मालपोत कर तिर्नका लागि दुई दिनको पैदल बाटो हिँडेर सेवा लिने गरेको बताउनुभयो । 

त्रिवेणी नगरपालिका–७ का वडा अध्यक्ष प्रेम थापाले वडामा सचिव नहँुदा जनताले दुई दिनको पैदल बाटो हिँडेर यहाँबाट सेवा सुविधा लिने गरेको स्वीकार गर्नुभयो । प्रदेश र सङ्घीय सरकारले स्थानीय तहमा कर्मचारी नखटाउँदा सचिव समेतको काम आफैले गर्नुपरेको अध्यक्ष थापाको भनाइ छ । 

अध्यक्ष थापाले वडा नं १, २, ३ र ४ बाहेकका स्थानीयबासीले साविकको छतारा गाविसमा गएर सेवा लिने गरेका छन् । नगरपालिकाका नौवटै स्थानीय तहका खरिदार वा सो सरहका कर्मचारी अर्थात वडा सचिव नहुँदा वडाको एक जना सचिव दिलबहादुर बुढाले नै नौवटै वडाको काम गर्नुपरेको अध्यक्ष थापाको गुनासो छ । 

त्यसैगरी वडा सचिव दिलबहादुर बुढाले प्रत्येक वडामा कर्मचारी नहुँदा आफूले जेनतेन जनतालाई सेवा दिँदै आएको बताउनुभयो । सङ्घीय सरकार र प्रदेश सरकारले कर्मचारी नपठाउँदा एक्लैले नौ वटै वडाको वडा सचिव भएर काम गर्नुपरेको राससलाई बताउनुभयो । 

जिल्ल्लाका नौवटै स्थानीय तहका नगरपालिका र गाउँपालिकाका गरी ६९ मध्ये ५४ वडा सचिव विहीन रहेका छन् । जिल्लाको दुर्गम क्षेत्रमा हिमाली गाउँपालिका, स्वामीकात्तिक गाउँपालिका, जगन्न्नाथ गाउँपालिकालगायतका स्थानीय तहमा भने सचिव नै नभएर वडा अध्यक्षले सचिवको काम गर्ने गरेको हिमाली गाउँपालिकाका अध्यक्ष गोविन्दबहादुर मल्लले जानकारी दिनुभयो । 

सङ्घीय सरकार र प्रदेश सरकारले मङ्सिर मसान्तभित्र कर्मचारी स्थानीय तहमा नखटाइए आन्दोलन गर्ने त्रिवेणी नगरपालिका–७ का वडा अध्यक्ष प्रेम थापाले जानकारी दिनुभएको छ । रासस।।

Advertisement