नेपालगञ्ज । सुनिल सिंह हमाल नेपालगञ्ज उप–महानगरपालिका २ का वडा अध्यक्ष । पाँच दशकअघि नेपालगञ्जको घरबारी टोलमा बुवा जोरावरसिंह हमाल र आमा रेणु हमालको कोखबाट जन्मिएका हमालमा यतिबेला आप्mनो जन्मस्थललाई उत्कृष्ट वडाको रुपमा विकास गर्ने जिम्मेवारी काँधमा आईपुगेको छ । नेपालगञ्जस्थित महेन्द्र बहुमुखी क्याम्पसमा अध्ययन गर्नेक्रममा नेविसंघमार्फत २०४२ सालको सत्याग्रह र २०४६ सालको जन आन्दोलनमा सक्रिय हमालका अभिभावकको पढेर छोराले राम्रो रोजगारी गरोस भन्ने चाहना थियो । त्यसका लागि नेपालगञ्जमा प्रविणता तह उत्तिर्ण गरेपछि थप पढाईका लागि भारतको लखनउ पठाएको थियो । तर साथीभाई र घरपरिवारको सम्झनाले केही महिनामै फर्केको हमाल स्मरण गर्नुहुन्छ । विद्यार्थी राजनीति मार्फत क्याम्पसमा क्रिकेट खेलको प्रतियोगिता गराउन सफल भएपछि हमालमा सक्रिय राजनीति गर्ने भावना बढेको बताउनुहुन्छ । हमालले लामो समयसम्म राजनीति र खेलकुदलाई सँगसँगै लिनुभयो । हमाल आफै पनि क्रिकेटको पुर्व राष्ट्रिय खेलाडी हुनुहुन्छ । बाँके जिल्ला क्रिकेट संघको पुर्ब अध्यक्ष र क्यानको पुर्ब केन्द्रीय सदस्य हुनुहुन्छ ।

Advertisement

करिब एकश दशक एञ्जल्स स्कुलमा कार्यरत रहँदा हमालले महिला क्रिकेट खेलाडी उत्पादनमा महत्वपूर्ण भूमिका दिनुभयो । हमाल नेपाली काँग्रेसको १३ औं महाधिवेशनमा क्षेत्रीय प्रतिनिधी हुँदै क्षेत्रीय सचिवमा निर्वाचित भएर कार्यरत रहनुभएको छ ।
वडा अध्यक्षमा निर्वाचित भएपछि हमालले सडक विस्तारलाई प्राथमिकता दिनुभएको छ । घरबारीटोल सडकलाई विस्तार गर्न सक्नु ठुलो उपलब्धी भएको उहाँले बताउनुभयो । स्थानीय बासिन्दासँगको निरन्तरको सम्पर्क र समन्वयले ठुलो चुनौतीमा सफलता प्राप्त भयो, वडा अध्यक्ष हमालले भन्नुभयो,– यो काम नेपालगञ्जकै लागि एतिहासिक हो । वडा कार्यालयको पहलमा बागेश्वरी मन्दिरको पार्कमा फ्रि वाईफाईको ब्यवस्था छ । घरबारी टोल र अन्य महत्वपूर्ण चोकमा वाईफाई फ्रि गर्ने तयारीमा वडा कार्यालय रहेको छ । बागेश्वरी मन्दिरको सौन्दर्यकरण र पर्यटकीय विकासमा वडाको ध्यान केन्द्रीत भएको छ । वडा कार्यालयले मन्दिरमा गेट समेत निर्माण गरिरहेको छ । घरबारी नेपालगञ्जको पुरानो वस्ती भएका कारण सडक पिसिसीका धेरै योजना छन् ।

तीनवटा ठुला सडकको निर्माण सकेपद्धि मुख्य सडकको काम सम्पन्न हुनेछ । भित्री सडक र सहायक सडकका भने धेरै पिसिसीका योजना छन् । वडा कार्यालयले बाल क्लब, युवा क्लब, महिला समूह, आमा समूह, महिला स्वास्थ्य स्वयमसेविका समूह लगायतका विभिन्न समूह गठन गरिसकेको छ भने सेवा निवृत्त राष्ट्र सेवकहरुको समूह गठन गर्ने तयारीमा रहेको वडा अध्य्रक्ष हमालले बताउनुभयो । बालमैत्री वडा घोषणाको तयारीमा वडा कार्यालय रहेको छ । महिलाहरुको माग अनुसार स्तन क्यान्सर र पाठेघरको क्यान्सर सम्बन्धि स्वास्थ्य शिविर संचालन गर्ने कार्यालयको आगामी योजना रहेको छ । यसैगरी जेष्ठ नागरिकलाई घरमै निशुल्क नियमित स्वास्थ्य उपचार गर्ने योजना वडा कार्यालयको रहेको छ । वडा कार्यालयमा अहिले पनि कर्मचारीको अभाव रहेको भन्दै हमालले वडा कार्यालयले ब्यवस्थापन गरि वडाबासीलाई छिटो र छरितोढंगले सेवा गर्दै आईरहेको बताउनुभयो ।