Advertisement

तिमीलाई हँसाउन हाँसी-हाँसी प्राण त्यागे उनले

आज तिमी त्यही प्यारो बलिदानमाथि हाँस्दैछौ
गाँसेर माला विरताको सहिद भए उनी
नबिर्स तिमी त्यही सहादतको उपकारमा बाँच्दैछौ

यहि स्वतन्त्रताका लागि आफ्नो रगत उमाले उनले
उमालेर यसैलाई अब पोख्न नखोज तिमी
स्वार्थैस्वार्थले भरिएको मस्तिष्क लिएर
शहिदको मूल्यलाई जोख्न नखोज तिमी ।

तिमी भन्छौ क्रान्तिले शान्ति भंग भयो
क्रान्तिबिनाको शान्ति कसले देखेको थियो
नियालेर हेर विश्व इतिहास फेरि
निरंकुशले आफै घुँडा कहाँ टेकेको थियो ।

लास बनेर गए उनीहरु
आज स्वतन्त्र तिमीले फेरिरहेको श्वासको लागि
जसको तस्बिर र तिमी गर्वका साथ भित्तामा सजाउँथ्यौ
तिनैको कालो कर्तुतको पर्दाफासको लागि
भ्रम र अज्ञानता त्याग
अब जाग्नुको विकल्प छैन
गरिदेउ पूरा शहिदका सपना
परिवर्तन र प्रगतिमा लाग्नुको विकल्प छैन ।
(भुजेल शहिद कमल भुजेलकी छोरी हुन्)