एजेन्सी। संसारमा यस्ता शहरहरु पनि छन् जहाँ कुनै समय बाक्लो बस्ती थियो र त्यहाँ थुप्रै मानिसहरु बसोवास गर्थे । तर, अहिले त्यहाँ जति खोज्दा पनि कोही मानिस भेटिँदैनन् । यस्तै शहरमध्येको एक हो इटलीको बालभानो शहर । यो शहरलाई अहिले ‘भूताहा शहर’ भनिन्छ ।  यो शहर २३ डिसेम्बर १९८० मा आएको भूकम्पमा विनाश भएको थियो ।

६.९ रेक्टर स्केलको भूकम्पले यो पूरै शहर तहसनहस पारेको थियो । यो घटनामा करिब २४८३ जनाको मृत्यु भएको थियो र ८ हजार भन्दा धेरै घाइते भएका थिए । भूकम्पका कारण शहरका आधाभन्दा बढी घर पूर्ण रुपमा भत्किएका थिए । यसले लाखौं जनता घरबारविहीन भए जो पाल टाँगेर झुपडीमा बसिरहेका थिए ।

यही बेला कैयौं मानिसहरुले यहाँ भट्किएका आत्मा देखेको दावी गरे । त्यसपछि यहाँ अनेकौं विचित्र घटना र दुर्घटना हुन थाले । लगत्तै यहाँका मानिसहरु यो शहरबाट पलायन हुन थाले । केही समयपछि नै लगभग पूरै शहर खाली भयो । त्यसपछि यो पूरै शहर त्यत्तिकै छ । अहिले पनि यहाँ आउने मान्छेहरु भूत देखेको दावी गर्ने गर्छन् । यही कारण सरकारले पनि यो शहरलाई फेरि बसाउने प्रयास गरेन । दिउँसोमा भने मानिसहरु यहाँ घुमफिर गर्न र फोटो खिच्न आउने गर्छन् ।

---